Նոյեմբերի 24-ին ՀՀ կրթության, գիտության, մշակույթի և սպորտի նախարարության և «Վերածնունդ» մշակութային և ինտելեկտուալ հիմնադրամի աջակցությամբ Արամ Խաչատրյան համերգասրահում կայացավ Կոմիտասի անվան ազգային քառյակի հիմնադրման 100-ամյակին նվիրված համերգ- հանդիսությունը։
Հոբելյանական երեկոն սկսվեց Հայաստանի պետական կամերային նվագախմբի կատարումներով։ Քառյակին նվիրված երաժշտական ողջույններով հանդես եկան ՀՀ ժողովրդական արտիստ, օպերային երգիչ Բարսեղ Թումանյանը, օպերային երգչուհի Հրաչուհի Բասենցը, դաշնակահար- դիրիժոր Վահագն Պապյանը, դաշնակահարուհի Կարին Հելլման- Գևորգյանը։ Համերգն ուղեկցվում էր քառյակի հարյուրամյա պատմության խոսուն դրվագները ներկայացնող տեսաշարով։
Քառյակին շնորհավորելու համար Մոսկվայից ժամանած Պ․ Ի․ Չայկովսկու անվան պետական կոնսերվատորիայի ռեկտոր, պրոֆեսոր Ալեքսանդր Սոկոլովը քառյակի երաժիշտներին պարգևատրեց Ն․ Գ․ Ռուբինշտեյնի անվան ոսկե մեդալներով։
Քառյակն իր հերթին «ԿՈՄԻՏԱՍԻ ԱՆՎԱՆ ՔԱՌՅԱԿ-100» հուշամեդալով պարգևատրեց Ա․ Սոկոլովին, վաստակաշատ կոմիտասական, ՀՀ վաստակավոր արտիստ, պրոֆեսոր Սուրեն Հախնազարյանին, քառյակի հիմնադրման 100-ամյակին նվիրված միջոցառումների գլխավոր աջակից «Վերածնունդ» հիմնադրամի հիմնադիր Արթուր Ջանիբեկյանին։
